Leave Without Allowances

കെ എസ് ആര്‍ ഭാഗം-1 ചട്ടം 86A,88,91,91A, Appendix XIIA, XIIB, XIIC  എന്നിവയിലാണ് ശൂന്യ വേതന അവധികളെ കുറിച്ച് പ്രതിപാദിച്ചിട്ടുള്ളത്.

റൂള്‍ 88 ലെ ശൂന്യ വേതന അവധി

    ഒരു ജീവനക്കാരന് എടുക്കാന്‍ മറ്റ് അവധികൾ ഒന്നും ഇല്ലാതിരിക്കുകയോ മറ്റ് അവധികൾ കണക്കിൽ ഉണ്ടെങ്കിലും അയാൾ രേഖാമൂലം ശൂന്യവേതന അവധിക്ക് ആവശ്യപ്പെടുമ്പോഴോ ആണ് റൂള്‍ 88 അനുസരിച്ചുള്ള ശൂന്യ വേതന അവധി അനുവദിക്കുന്നത്.ഇതനുസരിച്ച് മൂന്ന് വര്‍ഷത്തിൽ താഴെ മാത്രം സർവീസുള്ള സ്ഥിരമല്ലാത്ത ജീവനക്കാർക്ക് മൂന്ന് മാസത്തിൽ കൂടാത്ത കാലം വരെ തുടര്‍ച്ചയായി ശൂന്യ വേതന അവധി ലഭിക്കും.തുടര്‍ച്ചയായി അതിൽ കൂടുതൽ കാലം അയാൾ ശൂന്യവേതന അവധിയില്‍ തുടര്‍ന്നാൽ അയാളെ സര്‍വ്വീസിൽ‍ നിന്നും റിമൂവ് ചെയ്യും.

ഒരു വര്‍ഷം സര്‍വ്വീസുള്ള ജീവനക്കാർക്ക് അര്‍ബുദം,മാനസികരോഗം ക്ഷയം,കുഷ്ടം എന്നീ രോഗങ്ങൾക്ക് 18 മാസം വരെ അനുവദിക്കുന്ന ശൂന്യ വേതന അവധിയേയും സസ്പെന്‍ഷൻ കാലയളവ് ക്രമവത്കരിക്കുന്നതിന് എടുക്കുന്ന ശൂന്യ വേതന അവധിയേയും സര്‍വ്വീസിൽ നിന്നും റിമൂവ് ചെയ്യുന്ന നിബന്ധനയിൽ നിന്ന് ഒഴിവാക്കിയിട്ടുണ്ട്.നേരത്തെ പറഞ്ഞ അസുഖങ്ങളെ തുടര്‍ന്ന് ശൂന്യ വേതന അവധിയിൽ തുടരുന്ന ജീവനക്കാർക്ക് വ്യവസ്ഥകള്‍ക്ക് വിധേയമായി എക്സ് ഗ്രേഷ്യഅലവന്‍സ് അനുവദിക്കുന്നുണ്ട്.

മൂന്ന് വര്‍ഷത്തെ സേവനം പൂര്‍ത്തിയാക്കിയ സ്ഥിരമല്ലാത്ത ജീവനക്കാർക്കും (റൂൾ 86 A)  സ്ഥിരം ജീവനക്കാർക്കും തുടര്‍ച്ചയായി മൂന്ന് മാസത്തിൽ കൂടുതൽ ശൂന്യ വേതന അവധി ലഭിക്കും.നാല് മാസം വരെയുള്ള ഈ ശൂന്യവേതന അവധി അനുവദിക്കുന്നത് ഓഫീസ് മേധാവിയാണ്.എന്നാൽ 180 ദിവസം വരെയുള്ള അവധി വകുപ്പ് അധ്യക്ഷനാണ് അനുവദിക്കേണ്ടത്.ഈ അവധി കാലയളവ് 180 ദിവസത്തിൽ കൂടുകയാണെങ്കിൽ അവധി അനുവദിക്കേണ്ടത് സർക്കാർ ആണ്.സസ്പെൻഷൻ കാലയളവ് ക്രമവത്കരിക്കുന്നതിനാണ് നാല് മാസത്തില്‍ കൂടുതൽ ശൂന്യവേതന അവധി എടുക്കുന്നതെങ്കിൽ അപ്രകാരം അവധി അനുവദിക്കുന്നതിന് ഓഫീസ് മേധാവിക്ക് കഴിയും.

ശൂന്യവേതന അവധി അനുവദിക്കുന്നത് മെഡിക്കല്‍ സര്‍ട്ടിഫിക്കറ്റിന്‍റെ അടിസ്ഥാനത്തിലാണെങ്കിൽ ആ കാലയളവ് ഇൻക്രിമെന്റിന് പരിഗണിക്കുമെന്നതിനാൽ ,മെഡിക്കൽ സര്‍ട്ടിഫിക്കറ്റിന്‍റെ അടിസ്ഥാനത്തിലാണ് ശൂന്യവേതന അവധി അനുവദിക്കുന്നതെങ്കിൽ, അവധി അനുവദിച്ചിട്ടുള്ളത് മെഡിക്കല്‍ സര്‍ട്ടിഫിക്കറ്റിന്‍റെ അടിസ്ഥാനത്തിലാണെന്ന് സേവന പുസ്തകത്തിൽ രേഖപ്പെടുത്തണം.സേവന പുസ്തകത്തിൽ മെഡിക്കൽ സര്‍ട്ടിഫിക്കറ്റ് ഒട്ടിച്ചുവയ്ക്കുകയും വേണം.ശൂന്യവേതന അവധിയിൽ തുടര്‍ന്നതുകൊണ്ട് നിരീക്ഷണകാലം നീണ്ടാൽ അതനുസരിച്ച് സീനിയോറിറ്റി കുറയും.

റൂള്‍ 91 ലെ ശൂന്യവേതന അവധി

പട്ടികജാതി പട്ടികവര്‍ഗ്ഗത്തില്‍പ്പെട്ട ജീവനകാര്‍ക്കും രണ്ട് വര്‍ഷമോ അതിൽ കൂടുതലോ സേവനകാലയളവുള്ള മറ്റ് ജീവനകാര്‍ക്കും ജോലിയിൽ മെച്ചം ലഭിക്കുന്നതിനായി ഉയര്‍ന്ന യോഗ്യത നേടാൻ എടുക്കുന്ന ശൂന്യ വേതന അവധിയെ കുറിച്ചാണ് റൂൾ 91 പറയുന്നത്.

റൂള്‍ 91 A ലെ ശൂന്യവേതന അവധി

റൂള്‍ 91 A യില്‍ പറയുന്നത് അഞ്ച് വര്‍ഷമോ അതിൽ കൂടുതലോ സേവനകാലയളവുള്ള അദ്ധ്യാപകർ,എന്‍ജിനീയര്‍മാര്‍,ഡോക്ടര്‍മാർ എന്നിവര്‍ക്ക് പബ്ലിക് സർവീസിന്റെ പ്രയോജനം മുൻനിർത്തി അവരുടെ സേവന മേഖലയിലെ വിഷയങ്ങളിൽ പി.ജി കോഴ്സുകള്‍ക്ക് പോകുന്നതിന് അനുവദിക്കുന്ന  ശൂന്യവേതന  അവധിയെ കുറിച്ചാണ്.

അനുബന്ധം XII A, XII B, XII C എന്നിവയിലെ ശൂന്യവേതന അവധികള്‍

ഇന്ത്യയ്ക്ക് അകത്തോ പുറത്തോ മെച്ചപ്പെട്ട ജോലി സ്വീകരിക്കുന്നതിനുള്ള അവധിയാണ് XII A യിലെ ശൂന്യ വേതന അവധി. അകലെയുള്ള ഇണയോടൊപ്പം ചേരുന്നതിന് അനുവദിക്കുന്ന ശൂന്യ വേതന അവധിയാണ് അനുബന്ധം XII C  അനുസരിച്ചുള്ള അവധി.വകുപ്പ് അദ്ധ്യക്ഷനാണ് ഈ അവധികൾ  അനുവദിക്കുന്നത്.സാധാരണയായി ഒരുപ്രാവശ്യം അഞ്ച് വർഷത്തേക്ക് വരെ മാത്രമാണ് ഈ അവധികൾ അനുവദിക്കുന്നത്.പലപ്പോഴായി അത് സേവന കാലയളവിൽ 20 വര്‍ഷംവരെ ദീര്‍ഘിപ്പിക്കാം.പക്ഷെ വിരമിക്കുന്നതിനു ഒരു വർഷം മുൻപ് തിരികെ സർവീസിൽ പ്രവേശിച്ചിരിക്കണം.റൂള്‍ 88,91 എന്നിവ അനുസരിച്ചുള്ള അവധിക്ക് അര്‍ഹതയില്ലാത്തവര്‍ക്ക് പഠനത്തിനായി അനുവദിക്കുന്ന അവധിയാണ് അനുബന്ധം XII B  അനുസരിച്ചുള്ള അവധി.ഇത് സര്‍ക്കാരാണ് അനുവദിക്കുന്നത്.അവധി കാലയളവ് കഴിഞ്ഞാല്‍ ഉടൻ തിരികെ ജോലിയി ൽ പ്രവേശിച്ചിരിക്കണം.

നിരീക്ഷണകാലം തൃപ്തികരമായി പൂര്‍ത്തിയാക്കിയതായി പ്രഖ്യാപിക്കാതെ XII A, XII B, XII C എന്നിവയിലെ അവധിയില്‍ പോകുന്നവരുടെ പാസ്റ്റ് സര്‍വ്വീസ് നഷ്ടപ്പെടും. അവർ തിരികെ വരുമ്പോൾ പുതിയതായി ജോലിയിൽ പ്രവേശിച്ചതായി കരുതും.നിരീക്ഷണകാലം പുതിയതായി ആരംഭിക്കണം.

നിരീക്ഷണകാലം തൃപ്തികരമായി പൂര്‍ത്തിയാക്കിയതായി പ്രഖ്യാപിച്ച ശേഷം XII A, XII B, XII C എന്നീ അവധികളില്‍ പോകുന്നവർക്ക് അവർ അവധിയില്‍ തുടരുന്ന കാലത്തേക്ക് ഒരുവിധ ആനുകൂല്യങ്ങളും ലഭിക്കുകയില്ല.അവധി അനുവദിച്ചുകൊണ്ടുള്ള ഉത്തരവിലും സേവന പുസ്തകത്തിലും അവധി ഏതൊക്കെ ആനുകൂല്യങ്ങള്‍ക്ക് പരിഗണിക്കുകയില്ലെന്ന് രേഖപ്പെടുത്തേണ്ടതാണ്.

വിവിധതരത്തിലുള്ള ശൂന്യ വേതന അവധികൾ ഏതൊക്കെ സർവീസ് അനുകൂല്യങ്ങൾക്ക് പരിഗണിക്കും /പരിഗണിക്കുകയില്ല എന്ന് വ്യക്തമാക്കിയിട്ടുള്ള സർക്കുലറിന്റെ ലിങ്ക് ചുവടെ കൊടുത്തിരിക്കുന്നു. കാണുക.

കുറിപ്പ്: സ്ഥല  പരിമിതി മൂലം എല്ലാ നിബന്ധനകളും ഉൾക്കൊള്ളിക്കാൻ  സാധിച്ചിട്ടില്ല.കൂടുതൽ വിശദാംശങ്ങൾക്ക്  ബന്ധപ്പെട്ട ചട്ടങ്ങളും ഉത്തരവുകളും നോക്കുക.

Circular No.72/2005/Fin. Dated: 30.12.2005.

Civil Registration-Birth and Death Registration-Marriage Registration-Slide Show

ജനന/മരണ/വിവാഹ രജിസ്ട്രേഷനുകളുടെ നടപടിക്രമങ്ങൾ  ചുവടെ കൊടുത്തിരിക്കുന്ന പ്രസന്റേഷനിൽ കൂടി ലളിതമായി വിവരിക്കുന്നു.

Civil Registration-Procedure- Slide Show- Malayalam

Bylaws-Model Bylaws-Procedures to be followed in preparation of bylaws by panchayaths.

    1995 ലെ കേരള പഞ്ചായത്തു രാജ് ആക്ട് (ബൈലാകൾ ഉണ്ടാക്കാനുള്ള നടപടിക്രമം)ചട്ടങ്ങളിലാണ് ബൈലാകൾ ഉണ്ടാക്കാനുള്ള നടപടിക്രമങ്ങളെ കുറിച്ച് പ്രതിപാദിച്ചിട്ടുള്ളത്.ചട്ടം 3(5) അനുസരിച്ച് പഞ്ചായത്തു പാസാക്കിയ ഓരോ ബൈലായും സർക്കാരിലേക്കോ സർക്കാർ അധികാരപ്പെടുത്തിയ ഉദ്യോഗസ്ഥൻ മുമ്പാകെയോ അംഗീകാരത്തിനായി അയക്കേണ്ടതാണ്.S.R.O.നമ്പർ 431/97 അനുസരിച്ച്  പഞ്ചായത്തു പാസാക്കിയ ഓരോ ബൈലക്കും അംഗീകാരം നൽകേണ്ടത് പഞ്ചായത്ത് ഡയറക്ടറാണ്.ബൈലാകൾ ഉണ്ടാക്കാനുള്ള നടപടിക്രമം,മാതൃകാ ബൈലാകൾ എന്നിവയുടെ ലിങ്കുകൾ ചുവടെ കൊടുക്കുന്നു.

 1)Bylaw Approval Process 

 2)Advertisement Bylaw(Model)

 3)Community Hall Bylaw(Model)

 4)Grandhasala(Library) Bylaw(Model)

 5)Shopping Complex Bylaw(Model)

 6)Solid Waste Management Bylaw(Model)

 7)Plastic Waste Management(Green Protocol) Bylaw(Model)

INCREMENT - conditions

                 കെ. എസ്. ആര്‍. ഭാഗം ഒന്ന് - ചട്ടം - 31, 32, 33 എന്നിവയിലാണ് ഇന്‍ക്രിമെന്‍റിനെ കുറിച്ച് പ്രധാനമായും പ്രതിപാദിച്ചിട്ടുള്ളത്. ഒരു നിശ്ചിത സ്കെയിലിലെ ഒരു സ്റ്റേജായ തുക അടിസ്ഥാന ശബളം വാങ്ങിക്കൊണ്ടിരിക്കുന്ന ഒരു ജീവനക്കാരന്‍റെ അടിസ്ഥാന ശബളം അതേ സ്കെയിലിലെ തന്നെ തൊട്ടടുത്ത സ്റ്റേജിലേക്ക്, ഒരു വര്‍ഷം തികയുമ്പോൾ, വർദ്ധിപ്പിക്കുന്നതിനെയാണ് വാര്‍ഷിക ഇന്‍‍‍‍‍‍‍‍‍‍‍‍ക്രിമെന്‍റ് എന്ന് പറയുന്നത്.

    ഒരാൾ പുതിയതായി സർവീസിൽ പ്രവേശിച്ചാൽ ഒരു നിശ്ചിത കാലം നിരീക്ഷണത്തിൽ ആയിരിക്കും. പ്രസ്തുത നിരീക്ഷണകാലം രണ്ടു വര്‍ഷത്തെ ഡ്യൂട്ടിയാണെങ്കില്‍, പുതിയതായി സര്‍വ്വീസിൽ പ്രവേശിച്ച ജീവനക്കാരന്, ഡ്യൂട്ടി ഒരു വര്‍ഷം തികയുന്ന മാസത്തിന്‍റെ ആദ്യ ദിവസം പ്രാബല്യത്തില്‍ ആദ്യത്തെ ഇന്‍‍‍‍‍‍‍‍‍‍‍‍ക്രിമെന്‍റ്  ലഭിക്കും. എന്നാല്‍ രണ്ടാമത്തെ ഇന്‍‍‍‍‍‍‍‍‍‍‍‍ക്രിമെന്‍റ് നിരീക്ഷണകാലം തൃപ്തികരമായി പൂര്‍ത്തിയാക്കിയ തീയതി മുതലേ ലഭിക്കുകയുള്ളൂ.  മൂന്നാമത്തെ ഇന്‍‍‍‍‍‍‍‍‍‍‍‍ക്രിമെന്‍റ്  മുതലുള്ള ഇന്‍‍‍‍‍‍‍‍‍‍‍‍ക്രിമെന്‍റ്, മാസത്തെ ആദ്യ ദിവസം പ്രാബല്യത്തിൽ ലഭിക്കും. രണ്ടാമത്തെ ഇൻക്രിമെന്റിന്റെ തീയതി ദീര്‍ഘിച്ചിട്ടുണ്ടെങ്കിൽ അപ്രകാരം ദീർഘിപ്പിച്ചത് ഇന്‍‍‍‍‍‍‍‍‍‍‍‍ക്രിമെന്‍റിനെ ബാധിക്കുന്ന അവധി മൂലമാണെങ്കിൽ മൂന്നാമത്തെ ഇന്‍‍‍‍‍‍‍‍‍‍‍‍ക്രിമെന്‍റ് മുതലുള്ള ഇൻക്രിമെന്റുകൾ അതനുസരിച്ച് നീണ്ടുപോകുന്നതാണ്. ഒരു വര്‍ഷത്തെ ഡ്യൂട്ടി നിരീക്ഷണകാലമായുള്ള ജീവനക്കാർക്ക് നിരീക്ഷണകാലം തൃപ്തികരമായി പൂര്‍ത്തിയാകുന്ന ദിവസം മുതലേ ഇന്‍‍‍‍‍‍‍‍‍‍‍‍ക്രിമെന്‍റുകൾ ലഭിക്കുകയുള്ളൂ. ഇവർക്ക് രണ്ടാമത്തെ ഇന്‍‍‍‍‍‍‍‍‍‍‍‍ക്രിമെന്‍റ്  മുതലുള്ള ഇന്‍‍‍‍‍‍‍‍‍‍‍‍ക്രിമെന്‍റ്, മാസത്തെ ആദ്യ ദിവസം പ്രാബല്യത്തിൽ ലഭിക്കും.

         നിരീക്ഷണ കാലയളവുകൾ തൃപ്തികരമായി പൂര്‍ത്തീകരിച്ചതായുള്ള അധികാരിയുടെ ഉത്തരവ് ലഭിച്ച ശേഷം മാത്രമേ ആദ്യം പറഞ്ഞ കേസില്‍ രണ്ടാമത്തേത് മുതലുള്ള ഇന്‍‍‍‍‍‍‍‍‍‍‍‍ക്രിമെന്‍റുകളും രണ്ടാമത് പറഞ്ഞ കേസിൽ ആദ്യ ഇന്‍‍‍‍‍‍‍‍‍‍‍‍ക്രിമെന്‍റും അതിനെ തുടര്‍ന്നുള്ള ഇന്‍‍‍‍‍‍‍‍‍‍‍‍ക്രിമെന്‍റുകളും അനുവദിക്കാവൂ.  നിരീക്ഷണ കാലയളവിനുള്ളിൽ ഏതെങ്കിലും ഡിപ്പാര്‍ട്ട്മെന്‍റ്    ടെസ്റ്റുകളോ യോഗ്യതാ പരീക്ഷകളോ പാസ്സായിരിക്കണമെന്ന് നിഷ്കര്‍ഷിച്ചിട്ടുള്ള തസ്തികകളിൽ ആ യോഗ്യത നേടിയ ദിവസം മുതലേ ഇന്‍‍‍‍‍‍‍‍‍‍‍‍ക്രിമെന്‍റിന് അർഹത ഉണ്ടാകൂ. യോഗ്യത നേടിയശേഷം (ടെസ്റ്റ് പാസായ ശേഷം), ആ ഉദ്യോഗസ്ഥൻ യഥാസമയം ടെസ്റ്റ് പാസായി എന്ന നിഗമനത്തില്‍  തടഞ്ഞുവച്ച ഇൻക്രിമെന്റുകൾ നോഷണലായി നിശ്ചയിച്ചുനല്‍കും.

  മെഡിക്കൽ സര്‍ട്ടിഫിക്കറ്റിന്‍റെ അടിസ്ഥാനത്തിലല്ലാതെ റൂൾ 88 അനുസരിച്ച് എടുക്കുന്ന ശൂന്യവേതന അവധി, റൂള്‍ 91 അനുസരിച്ച് എടുക്കുന്ന ശൂന്യവേതന അവധി, അനുബന്ധം XII A, XII B, XII C എന്നിവ പ്രകാരം എടുക്കുന്ന ശൂന്യവേതന അവധികൾ, എന്നിവ ഇന്‍‍‍‍‍‍‍‍‍‍‍‍ക്രിമെന്‍റിനെ ബാധിക്കുന്ന അവധികളാണ്. അവധിയായോ ഡ്യൂട്ടിയായോ പരിഗണിച്ചിട്ടുള്ള സസ്പെൻഷൻ കാലയളവ് ഇന്‍‍‍‍‍‍‍‍‍‍‍‍ക്രിമെന്‍റിന് പരിഗണിക്കും. ശൂന്യവേതന അവധികളായി പരിഗണിക്കപ്പെട്ടിട്ടുള്ള സസ്പെൻഷൻ കാലയളവ്, ക്രമവത്കരിക്കപ്പെടാത്ത സസ്പെൻഷൻ കാലയളവ് എന്നിവ ഇന്‍‍‍‍‍‍‍‍‍‍‍‍ക്രിമെന്‍റിന് പരിഗണിക്കപ്പെടുകയില്ല. ഡയസ് ഡയസ്‌നോൺ ഇൻക്രിമെന്റിനെ ബാധിക്കുകയില്ല. 

     01.10.1994 ന് ശേഷമുള്ള താല്‍ക്കാലിക സര്‍വ്വീസുകളും ഇന്‍‍‍‍‍‍‍‍‍‍‍‍ക്രിമെന്‍റിന് പരിഗണിക്കുകയില്ല. അനുവദിക്കപ്പെട്ട അവധിക്കുശേഷം ശൂന്യവേതന അവധിയായി പരിഗണിച്ചിട്ടുള്ള അവധി കാലയളവ്, ശൂന്യവേതന അവധിയായി പരിഗണിച്ചിട്ടുള്ള പ്രവേശന കാലത്തിലെ ഓവർ സ്റ്റേയൽ, താഴ്ന്ന തസ്തികയിലുള്ള കാലയളവ് എന്നിവയും ഇന്‍‍‍‍‍‍‍‍‍‍‍‍ക്രിമെന്‍റിന് പരിഗണിക്കപ്പെടുകയില്ല. ഉയര്‍ന്ന പോസ്റ്റിലെ സേവന കാലയളവ്, പരിശീലന കാലയളവ്, കുറച്ച് കാലത്തെ പ്രൊമോഷന് ശേഷം റിവർട്ട്  ചെയ്യപ്പെട്ടാൽ പ്രൊമോഷനില്‍ ഇരുന്ന കാലയളവ്, ഒഴിവില്ലാ എന്ന കാരണത്താൽ സര്‍വ്വീസിൽ നിന്നും പുറത്താക്കപ്പെട്ടയാള്‍ക്ക് പിന്നീട് അതേ സ്കെയിലിൽ പുതിയ നിയമനം ലഭിച്ചാല്‍ പഴയ സേവന കാലയളവ് എന്നിവ ഇന്‍‍‍‍‍‍‍‍‍‍‍‍ക്രിമെന്‍റ് പരിഗണിക്കും.

               അച്ചടക്ക നടപടിയുടെ ഭാഗമായി ഇൻക്രിമെന്റുകൾ താൽകാലികമായോ സ്ഥിരമായോ തടയപ്പെട്ടാൽ ഇൻക്രിമെന്റ് ലഭിക്കുന്നതിന് അതനുസരിച്ച് തടസം വരും. ഇൻക്രിമെന്റ് ഒരു നിശ്ചിത കാലത്തേക്ക് താത്കാലികമായി തടഞ്ഞാൽ ആ വർഷങ്ങളിൽ ലഭിക്കേണ്ട ഇൻക്രിമെന്റുകൾ ലഭിക്കുകയില്ല. തടഞ്ഞുവച്ചിട്ടുള്ള കാലാവധി കഴിയുമ്പോൾ തടഞ്ഞുവച്ച ഇൻക്രിമെന്റുകൾ കൂടി അന്നു മുതൽ ലഭിക്കും. എന്നാൽ ഇൻക്രിമെന്റ് സ്ഥിരമായാണ് തടയുന്നതെങ്കിൽ ആ ഇൻക്രിമെന്റുകൾ എന്നന്നേക്കുമായി നഷ്ടപ്പെടും.

    സ്കെയിലിന്‍റെ പരമാവധി എത്തിയിട്ടുള്ളവർക്ക് സ്റ്റാഗ്നേഷൻ ഇന്‍‍‍‍‍‍‍‍‍‍‍‍ക്രിമെന്‍റായി നാലുവര്‍ഷം വരെ ഓരോ ഇന്‍‍‍‍‍‍‍‍‍‍‍‍ക്രിമെന്‍റും നാല് വര്‍ഷത്തിന് ശേഷം രണ്ട് വര്‍ഷത്തേയ്ക്ക് ഒരു ഇന്‍‍‍‍‍‍‍‍‍‍‍‍ക്രിമെന്‍റും ലഭിക്കും. അതിനുശേഷം ഇന്‍‍‍‍‍‍‍‍‍‍‍‍ക്രിമെന്‍റ് ലഭിക്കുകയില്ല. അടിസ്ഥാന ശബളം 120000 /- രൂപ ലഭിക്കുന്നവര്‍ക്കും പിന്നീട് ഇന്‍‍‍‍‍‍‍‍‍‍‍‍ക്രിമെന്‍റിന് അര്‍ഹതയില്ല. പാർട്ട് ടൈം കണ്ടിജൻസി ജീവനക്കാർക്കും വാർഷിക ഇൻക്രിമെന്റുകൾ ലഭിക്കും. അവർക്കുള്ള സ്റ്റാഗ്നേഷൻ ഇൻക്രിമെന്റുകൾ മൂന്നാണ്-രണ്ടെണ്ണം വാർഷിക ഇൻക്രിമെന്റുകളും അവസാനത്തേത് രണ്ടു വർഷത്തേക്ക് ഒന്നും.

                 അന്തര്‍ വകുപ്പ് സ്ഥലംമാറ്റം ലഭിക്കുന്ന ജീവനക്കാരൻ പുതിയ വകുപ്പിൽ സേവനത്തില്‍ പ്രവേശിച്ച തീയതി മുതൽ പുതിയ വകുപ്പിൽ നിരീക്ഷണ കാലത്തിലായിരിക്കും. ഈ കാലയളവ് പൂര്‍ത്തീകരിക്കുന്നതിനുള്ളിൽ വരുന്ന പഴയ തസ്തികയിലെ ഇന്‍‍‍‍‍‍‍‍‍‍‍‍ക്രിമെന്‍റ്, ഇന്‍‍‍‍‍‍‍‍‍‍‍‍ക്രിമെന്‍റ് തീയതികളിൽ സാധാരണ പോലെ ലഭിക്കും അടുത്ത ഇൻക്രിമെന്റുകൾ നിരീക്ഷണ കാലം പൂര്‍ത്തീകരിച്ചാൽ മാത്രമേ ലഭിക്കുകയുള്ളൂ. ഉദാഹരണമായി 01.10.2019 ൽ ഇന്‍‍‍‍‍‍‍‍‍‍‍‍ക്രിമെന്‍റ് ലഭിച്ചുകൊണ്ടിരുന്നയാള്‍ക്ക് 21.05.2020- ൽ അന്തർ വകുപ്പ്സ്ഥലംമാറ്റം ലഭിച്ചു എന്ന് കരുതുക. ടിയാന്‍ പുതിയ വകുപ്പിൽ 20.05.2022 വരെ നീരീക്ഷണത്തില്‍ ആയിരിക്കും എന്നും കരുതുക.01.10.2020 ലെയും 01.10.2021 ലെയും ഇൻക്രിമെന്റുകൾ സാധാരണ പോലെ ലഭിക്കും. അടുത്ത ഇന്‍‍‍‍‍‍‍‍‍‍‍‍ക്രിമെന്‍റ് നിരീക്ഷണകാലം പൂര്‍ത്തീകരിച്ചാലെ ലഭിക്കൂ. ഇയാളുടെ നീരീക്ഷണകാലം ഒരു വര്‍ഷമാണെന്ന് കരുതുക എങ്കിൽ അയാൾക്കു 01.10.2020 ലെ ഇന്‍‍‍‍‍‍‍‍‍‍‍‍ക്രിമെന്‍റ് മാത്രമേ ലഭിക്കൂ. അടുത്ത ഇന്‍‍‍‍‍‍‍‍‍‍‍‍ക്രിമെന്‍റ് നിരീക്ഷണകാലം പൂര്‍ത്തിയാക്കിയാലെ ലഭിക്കുകയുള്ളൂ.

       01.01.1986 ന് മുമ്പ് സേവനത്തിൽ പ്രവേശിച്ചിട്ടുള്ള SC/ST വിഭാഗത്തിൽപെട്ട ജീവനക്കാരെ പ്രമോഷനും പ്രൊബേഷനും ബാധകമായ ടെസ്റ്റ് യോഗ്യതകളിൽ നിന്നും ഒഴിവാക്കുന്നതിനാൽ അവർക്കു ഇന്‍‍‍‍‍‍‍‍‍‍‍‍ക്രിമെന്‍റ് ലഭിക്കുന്നതിന് അര്‍ഹതയുണ്ട്. 01.01.1986 മുതൽ സേവനത്തിൽ പ്രവേശിച്ചിട്ടുള്ള അത്തരം വിഭാഗത്തില്‍പ്പെട്ട ജീവനക്കാരെ ടെസ്റ്റ് യോഗ്യതകളിൽ നിന്നും ഒഴിവാക്കിയിട്ടില്ലാത്തതിനാല്‍ അവര്‍ക്ക് പ്രൊബേഷന് ബാധകമായ ടെസ്റ്റ് പാസാകാതെ ഇന്‍‍‍‍‍‍‍‍‍‍‍‍ക്രിമെന്‍റ് ലഭിക്കുകയില്ല. www.lsgadministration.com 

Pension-PRISM-How to Download PPO,GPO,CPO

    സംസ്ഥാനത്തെ സർക്കാർ ജീവനക്കാരുടെയും അദ്ധ്യാപകരുടെയും പെൻഷൻ അപേക്ഷകൾ ഇപ്പോൾ ഓൺലൈൻ ആയി PRISM-(Pensioners Information System) എന്ന സോഫ്ട്‍വെയറിൽ  പരിശോധിച്ചാണ് തീർപ്പാക്കുന്നത്.പെൻഷൻ അപേക്ഷകൾ തീർപ്പാക്കുന്നതിനുസരിച്ച് പെൻഷനറുടെ മൊബൈലിലേക്ക് ഇത് സംബന്ധിച്ച് സന്ദേശം ലഭിക്കും.തുടർന്ന്:-

1) സന്ദേശത്തിൽ നൽകിയിരിക്കുന്ന ലിങ്കിൽ കയറി Create/Forgot  Password ക്ലിക് ചെയ്യുക.

2)ലഭിക്കുന്ന സ്‌ക്രീനിൽ PPO നമ്പർ,ഇമെയിൽ,മൊബൈൽ നമ്പർ എന്നിവ കൊടുത്ത് submit ചെയ്യുക.

3)നിങ്ങളുടെ മൊബൈലിൽ ഒരു പാസ്സ്‌വേർഡ് ലഭിക്കും.

4)വീണ്ടും  ലിങ്കിൽ പ്രവേശിച്ച് PPO നമ്പറും ലഭിച്ച പാസ്സ്‌വേർഡും കൊടുത്ത് ലോഗിൻ ചെയ്യുക.

5) ലഭിക്കുന്ന പേജിൽ നിന്നും PPO,GPO,CPO എന്നിവ ഡൗൺ ലോഡ് ചെയ്യാം.

6)Descriptive Roll and Identification Particulars,LPC എന്നിവ പെൻഷൻസാങ്ക്ഷൻ അതോറിറ്റി/ വകുപ്പ് അധ്യക്ഷൻ ബന്ധപ്പെട്ട ട്രെഷറിക്ക് അയച്ചുകൊടുത്തു എന്ന് ഉറപ്പാക്കിയ ശേഷം ആധാർ കാർഡ്  / പാൻ കാർഡ് /ഇലക്ഷൻ ഐ.ഡി.യുമായി ട്രെഷറിയിൽ ചെല്ലുക. 

Guidelines For Conduct of Elections During Covid-19

കോവിഡ്-19 ന്റെ ഭാഗമായി തെരഞ്ഞെടുപ്പ് പ്രവർത്തനങ്ങളിൽ പാലിക്കേണ്ട നിയന്ത്രണങ്ങൾ സംബന്ധിച്ച കേന്ദ്ര തിരഞ്ഞെടുപ്പ് കമ്മീഷന്റെ മാർഗ്ഗനിർദ്ദേശങ്ങൾ - (Document No.324.6.EPS.OT.001.2020) 

കോവിഡ്-19 ന്റെ ഭാഗമായി തെരഞ്ഞെടുപ്പ് പ്രവർത്തനങ്ങളിൽ പാലിക്കേണ്ട നിയന്ത്രണങ്ങൾ സംബന്ധിച്ച സംസ്ഥാന തിരഞ്ഞെടുപ്പ് കമ്മീഷന്റെ മാർഗ്ഗനിർദ്ദേശങ്ങൾ - Covid Guidelines SEC 2020 

Leaves Exclusively For Women Government Employees

കെ.എസ്.ആര്‍.ഭാഗം - I സെക്ഷൻ IX ലെ റൂൾ 100 അനുസരിച്ച് 180 ദിവസത്തെ പ്രസവാവധി (MATERNITY LEAVE)  വനിത ജീവനക്കാര്‍ക്ക് ലഭിക്കും. താത്കാലിക ജീവനക്കാർക്കും പാര്‍ട്ടൈം ജീവനക്കാർക്കും പൊതുമേഖലാ സ്ഥാപനങ്ങളിലെ ജീവനക്കാർക്കും പ്രസവാവധി അനുവദിക്കും. പ്രസവാവധി കഴിഞ്ഞ്  തിരികെ ജോലിയിൽ പ്രവേശിക്കാൻ കരാർ കാലാവധി ഉണ്ടെങ്കിൽ ഒരു  വര്‍ഷത്തിൽ കൂടുതൽ കരാർ കാലാവധിയുള്ള ജീവനക്കാർക്കും പ്രസവാവധിക്ക് അര്‍ഹതയുണ്ട്. ഒരു വർഷത്തിൽ കൂടുതലായി ഒരു വകുപ്പിൽ തന്നെ താൽകാലികമായി ജോലിനോക്കുന്ന  വനിതകൾക്ക് ചട്ടം 100,101 എന്നിവ അനുസരിച്ചുള്ള പ്രസവാവധി ലഭിക്കും. നിയമനത്തിനു മുന്നോടിയായുള്ള സ്റ്റൈപ്പെൻഡറി പരിശീലനത്തിനു നിയോഗിക്കപ്പെട്ടിട്ടുള്ള  Provisional Female Recruits ന് പരിശീലനകാലത്തെ  മുഴുവൻ സ്റ്റൈപ്പൻറ്റോടുകൂടി ചട്ടം 100,101 എന്നിവയിലുള്ള പ്രസവാവധികൾ  ലഭിക്കും.  

പി.എസ്‌.സി.വഴി ജോലി ലഭിച്ചതിനെ തുടർന്ന്, പ്രസവ തീയതിക്ക് ശേഷം 180 ദിവസത്തിനുള്ളിൽ ജോലിയിൽ പ്രവേശിക്കേണ്ടി വരുന്ന വനിതകൾക്ക് പ്രസവ ശുശ്രൂഷ നടത്തിയ ഡോക്ടറുടെ കയ്യിൽ നിന്നുള്ള പ്രസവ തീയതി കാണിച്ചുകൊണ്ടുള്ള മെഡിക്കൽ സർട്ടിഫിക്കറ്റ്,കെ.എസ്.ആർ. ഭാഗം ഒന്ന് ചട്ടം 13 പ്രകാരമുള്ള മെഡിക്കൽ സർട്ടിഫിക്കറ്റ് എന്നിവയുടെ അടിസ്ഥാനത്തിൽ, ജോലിയിൽ പ്രവേശിച്ച ശേഷം തൊട്ടടുത്ത ദിവസം മുതൽ ബാക്കിയുള്ള പ്രസവാവധി എടുക്കാം. ഇപ്രകാരം ജോലിയിൽ പ്രവേശിച്ച ദിവസത്തിനു  ശേഷം തൊട്ടടുത്ത്  അവധി ദിവസങ്ങൾ/ ഒഴിവുകാലം ഉണ്ടെങ്കിൽ ആ അവധി ദിവസങ്ങളെ/ ഒഴിവുകാലങ്ങളെ കൂടി പ്രസവാവധിയായിട്ടാണ് പരിഗണിക്കുന്നത്. കെ.എസ്.ആർ.ഭാഗം - I അനുബന്ധം 12 A, 12 B, 12 C എന്നിവയിലായിരിക്കേ പ്രസവിക്കുന്ന ജീവനക്കാരി പ്രസവ ശേഷം മടങ്ങി വന്നാല്‍ ബാക്കിയുള്ള ദിവസങ്ങളിലേക്ക് പ്രസവാവധി അനുവദിക്കുകയില്ല.

പ്രസവാവധിയിലായിരിക്കുന്നവര്‍ക്ക് പുതിയ നിയമനമോ, സ്ഥലം മാറ്റമോ ലഭിച്ചാല്‍ പുതിയ സ്ഥലത്ത് ജോലിയിൽ പ്രവേശിച്ച ശേഷം പിറ്റേ ദിവസം മുതൽ ബാക്കിയുള്ള പ്രസവാവധി എടുക്കാം.

ആറ് ആഴ്ചയിൽ അധികരിക്കാത്ത പ്രസവാവധി, ഗര്‍ഭം അലസൽ/ ഗര്‍ഭം അലസിപ്പിക്കൽ (Miscarriage including Abortion) എന്നിവയ്ക്കും ലഭിക്കും.ചട്ടം 101 ലാണ് ഈ അവധിയെ കുറിച്ച് പറയുന്നത്.ഈ അവധിക്കായി മെഡിക്കല്‍ സര്‍ട്ടിഫിക്കറ്റ് ഹാജരാക്കണം.

 ആര്‍ജ്ജിത അവധി, ഹാഫ് പേ ലീവ് , ശബളമില്ലാത്ത അവധി, ലീവ് നോട്ട് ഡ്യൂ , എന്നിവ പ്രസവ അവധിയോട് ചേര്‍ത്തെടുക്കാം. എന്നാല്‍ ഇത്തരത്തിൽ പ്രസവാവധിയോട് തുടർന്നെടുക്കുന്ന അവധി 60 ദിവസത്തിൽ കൂടുകയാണെങ്കിൽ, അമ്മയുടെ സാമീപ്യവും വ്യക്തിപരമായ ശ്രദ്ധയും കുട്ടിക്ക് അത്യന്താപേക്ഷിതമാണെന്ന മെഡിക്കൽ സര്‍ട്ടിഫിക്കറ്റ് ഹാജരാക്കണം(Rule 102).

ഗര്‍ഭപാത്രം നീക്കം ചെയ്യുന്നതിന് (Hysterectomy-ശസ്ത്രക്രിയ ചെയ്ത് ഗര്‍ഭപാത്രം നീക്കല്‍) വിധേയരാകുന്ന, കെ.എസ്.ആർ. ബാധകമായ പൊതു മേഖല സ്ഥാപനങ്ങളിലേത് ഉൾപ്പെടെയുള്ള, വനിതാ ജീവനക്കാർക്ക് 45 ദിവസത്തെ, ചട്ടം 100 അനുസരിച്ചുള്ള, പ്രസവാവധി  ലഭിക്കും.  കെ.എസ്.ആര്‍ ഭാഗം 1 ചട്ടം 101എ യിലാണ് ഇതിലെ വ്യവസ്ഥകള്‍ ഉള്‍കൊള്ളിച്ചിട്ടുള്ളത്.ഈ അവധിക്കായി മെഡിക്കല്‍ സര്‍ട്ടിഫിക്കറ്റ് ഹാജരാക്കണം.പാര്‍ടൈം ജീവനകാര്‍ക്കും ഈ ആനുകൂല്യം ലഭിക്കും.

വാടക ഗർഭപാത്രം സ്വീകരിച്ചിട്ടുള്ള (surrogacy) അമ്മക്ക്  180 ദിവസത്തെ പ്രസവാവധി കുഞ്ഞു ജനിക്കുന്ന ദിവസം മുതൽ ലഭിക്കും.ഇതിനായി മെഡിക്കൽ സർട്ടിഫിക്കറ്റ് ഹാജരാക്കണം(G.O.(P)No.2/2016/Fin. Dated:12.01.2016).

പ്രസവാവധിക്കാലത്തെ ശമ്പളം ആർജിത അവധികാലത്ത് ലഭിക്കുന്ന നിരക്കിൽ ലഭിക്കും. ചട്ടം 100 ,101 എന്നിവയിലെ പ്രസവാവധികൾ നിരീക്ഷണകാലത്തിന് ഡ്യൂട്ടിയായി പരിഗണിക്കും.എന്നാൽ അവയോടൊപ്പം ചേർത്തെടുക്കുന്ന മറ്റ് അവധികൾ നിരീക്ഷണകാലത്തിന് ഡ്യൂട്ടിയായി പരിഗണിക്കുകയില്ല.അതുപോലെ പ്രസവാവധിയും  അവയോടൊപ്പം ചേർത്തെടുക്കുന്ന മറ്റ് അവധികളും ആർജിത അവധി കണക്കാക്കുന്നതിനും ഡ്യൂട്ടിയായി പരിഗണിക്കുകയില്ല. 

വനിത ഉദ്യോഗസ്ഥര്‍ക്ക് ലഭിക്കുന്ന മറ്റൊരു അവധിയാണ് ചൈല്‍ഡ് അഡോപ്ഷന്‍ ലീവ്(Child Adoption Leave). കെ.എസ്.ആർ. ഭാഗം 1 സെക്ഷൻ IX A ലെ ചട്ടം 102എ യിലാണ് ഇതിനുള്ള വ്യവസ്ഥകള്‍ ഉള്ളത്. രണ്ടിൽ താഴെ കുട്ടികള്‍ ഉള്ള വനിത ജീവനക്കാര്‍ ഒരു വയസ്സുവരെ പ്രായമായ കുട്ടിയെ ദത്തെടുക്കുമ്പോഴാണ് 180 ദിവസത്തേക്കുള്ള ഈ അവധി ലഭിക്കുന്നത്. നിയമപരമായി കട്ടിയെ ദത്ത് എടുക്കുന്ന ദിവസം (from the date of legal adoption) മുതലാണ് ഈ അവധി  ലഭിക്കുന്നത്.ഈ അവധിയോട് ചേര്‍ത്ത് അനുബന്ധം 12 A, 12 B, 12 C എന്നിവ ഒഴികെയുള്ള സാധാരണ അവധികൾ (ലീവ് നോട്ട് ഡ്യൂ, കമ്യൂറ്റഡ് ലീവ് എന്നിവ ഉൾപ്പെടെ) എടുക്കാം. ഇപ്രകാരം ചേര്‍ത്ത് എടുക്കുന്ന അവധിയുടെ കാലയളവ് കുട്ടിയുടെ പ്രായം ഒരു വര്‍ഷത്തിൽ കൂടുന്ന കാലയളവിലേക്ക് ലഭിക്കുകയില്ല. ചേര്‍ത്ത് എടുക്കുന്ന അവധി 60 ദിവസത്തിൽ കൂടുകയാണെങ്കിൽ,അമ്മയുടെ സാമീപ്യവും വ്യക്തിപരമായ ശ്രദ്ധയും കുട്ടിക്ക് അത്യന്താപേക്ഷിതം ആണെന്ന മെഡിക്കൽ സര്‍ട്ടിഫിക്കറ്റ് ആവശ്യമാണ്.

  ജോലിസ്ഥലങ്ങളിൽ ലൈംഗിക അതിക്രമങ്ങള്‍ക്ക് വിധേയരാകുന്ന സ്ത്രീകള്‍ക്ക്,അന്വേഷണവുമായി ബന്ധപ്പെട്ട് 90 ദിവസത്തേക്ക് പ്രത്യേക അവധി (Special Leave) ലഭിക്കും( Leave Connected to inquiry into Sexual Harassment) (Rule 102 C). ഇന്‍റേര്‍ണൽ കംപ്ലയ്ന്‍റ് കമ്മിറ്റിയുടെയോ, ലോക്കല്‍ കംപ്ലയ്ന്‍റ് കമ്മിറ്റിയുടെയോ ശുപാര്‍ശയുടെ അടിസ്ഥാനത്തിലാണ് ഈ അവധി അനുവദിക്കുന്നത്. അന്വേഷണം നടക്കുന്ന കാലയളവിലേക്ക് മാത്രമാണ് ഈ അവധി. അനുബന്ധം 12 A, 12 B, 12 C എന്നിവ ഒഴികെയുള്ള മറ്റ് അവധികളോട് ചേര്‍ത്ത് ഈ അവധി എടുക്കാം. മുഴുവന്‍ ശബളവും ലഭിക്കും.സ്പെഷ്യൽ ലീവ് രജിസ്റ്ററിൽ അവധിയുടെ വിവരം എഴുതണം.

 മൂന്നിൽ താഴെ കുട്ടികളുള്ള വനിത ജീവനക്കാര്‍ക്ക് എം.റ്റി.പി ക്ക് വിധേയരാകുമ്പോള്‍ എം.റ്റി.പി നടത്തിയ ദിവസം മുതല്‍ 6 ദിവസത്തേക്ക് സ്പെഷ്യൽ കാഷ്വൽ ലീവ് (സർവീസിൽ ഒരിക്കൽ മാത്രം) ലഭിക്കും. എം.റ്റി.പി ക്ക് ശേഷം ഗര്‍ഭ നിരോധന ശസ്ത്രക്രിയയ്ക്ക്(Salpingectomy Operation) വിധേയമാകുമ്പോൾ 14 ദിവസത്തെ സ്പെഷ്യൽ കാഷ്വൽ ലീവ് ലഭിക്കും. എം റ്റി പി ഇല്ലാതെ ഗര്‍ഭ നിരോധന ശസ്ത്രകിയ മാത്രം ആയാലും ഇത് ലഭിക്കും. ഐ.യു.സി.ഡി പോലുള്ള ഗര്‍ഭ നിരോധന മാര്‍ഗ്ഗം സ്വീകരിക്കുന്ന സ്ത്രീ ജീവനകാര്‍ക്ക് ആ ഒരു ദിവസത്തേയ്ക്ക് സ്പെഷ്യൽ കാഷ്വൽ ലീവ് ലഭിക്കും.(Nandakumar C)